ملګري ملتونو پرېکړه کې ده ، چې سر له نن به له افغانستان څخه خپل ٩٠٠ بهرني مامورين اوباسي .

 دغه پرېکړه وروسته له هغه وشوه ، چې تېره اونۍ (د لړم په ٦ مه ) د کابل ښار د شيرپور په سيمه کې د باختر په نوم د ملګرو ملتونو پر يوه مېلمستون  بريدترسره شو، چې  په پايله کې يې ٦ بهرنيان، ٢ د ملي امنيت کارکوونکي او يو عام وګړى ووژل شول  او د ٨ بهرنيانو په ګډون ١٣ افغانان ټپيان شول .  

د پژواك د خبري اژانس د خبر له مخې په کابل کې د ملګرو ملتونو دسياسي همکارۍ ددفتر ( يوناما) يوې سرچينې د لړم په ١٤مه، رسنيو ته ويلي، چې ددغو بهرنيو مامورينود وتلو لړۍ به سر له نن څخه (د لړم ١٤مه ) پيل شي .

سرچينې زياته کړې ده،  چې دغه پرېکړه دامنيتي ستونزو له امله شوې ده .

د يوناما يادې شوې سرچينې، چې دنوم له څرګندولو يې ډډه کړې ، وايي  چې دوى اوسمهال په افغانستان کې ١٣٠٠ بهرني مامورين لري ، چې له دې وروسته به يې يواځې ٤٠٠  بهرني مامورين په افغانستان کې پاتې شي .

  د يوناما يو تن وياند نظيف الله سالارزي پژواک خبري اژانس ته ومنله، چې دوى غواړي د خپلو بهرنيو مامورينو شمېره کمه کړي، خو دقيقه شمېره يې ونه ښوده .   نوموړي زياته کړه : (( هغه مامورين له افغانستان څخه ځي، چې دلته ورته ډېره اړتيا نه ليدل کېږي .)) 

 

د سالارزي په وينا، په دې اړه به د ملګرو ملتونو د سرمنشي  ځانګړى استازى او د يوناما مشر کاى ايډه  نن له غرمې مخکې د يوې خبري غونډې په ترڅ کې رسمي نظر ورکړي .

  بلخوا د يوناما لخوا نن په يوه خپره شوې خبرپاڼه کې ويل شوي دي ، چې دوى د خپلو افغان او بهرنيو مامورينو د امنيت ساتنې لپاره نور اقدامات کوي .  

په خبرپاڼه کې زياته شوې ده ، چې دوى دامنيتي ملحوظاتو له امله ددغو امنيتي تدابيرو په اړه معلومات نه شي ورکولى .

  سرچينې ويلي : (( ملګري ملتونه په افغانستان کې خپلو کړيو وعدو ته ژمن دى ، زموږ اړيکې له افغانستان سره له تېرو نږدې سلو کلونو راهيسې ټينګې دي، زموږ هڅې دافغانستان دخلکو د مرستې لپاره دي . )) 

ملګرو ملتونو ويلي دي، چې  دوى نوي امنيتي تدابير ددې لپاره نيولي، څو ددوى د فعالتيونو د ګډوډولو مخه ونيول شي .